Blog 03.08.2022
«Big Data ed intelligentscha artifiziala giogan ina rolla en tut las dimensiuns da la transformaziun digitala.»
Sco spezialista da datas ta fatschentas l’entir di cun cifras. Na daventa quai betg monotonic, u èsi mo in pregiuditg?
«L’idea che datas sajan mo cifras è definitivamain in pregiuditg. Datas èn bler dapli che mo cifras. Naturalmain hai jau sco data scientist ina predilecziun per cifras, datas ed algoritmus. Quai che jau chat fitg interessant è la lavur sco "detectiva". Mintga cas d’applicaziun e mintga set da datas represchenta ina nova sfida che sto vegnir schliada. Tge model porscha ils megliers resultats? Tge datas da input ston vegnir cumbinadas? E chattain nus ina soluziun adattada per l’industria?»
«Quai è dentant mo ina part dal lavur. L’emprim ston il potenzial ed ils cas d’applicaziun vegnir identifitgads e valitads. Ina ulteriura incumbensa impurtanta è l’integraziun dals algoritmus e lur resultats en l’organisaziun.»
Quant impurtantas èn datas en connex cun la transformaziun digitala?
«Big Data ed intelligentscha artifiziala fan part da la transformaziun digitala. Ellas giogan ina rolla en tut las dimensiuns da la transformaziun digitala: utilisaders digitals, process digitals, products intelligents fin a digital business. Senza datas na fiss quai insumma betg pussibel da represchentar tut quai digitalmain.»
Tar il tema Big Data vegn savens era menziunà il tema da la protecziun da datas. Quant impedeschan talas leschas la digitalisaziun? U vesas ti era avantatgs?
«La dumonda quant intensiv che datas vegnan duvradas è adina in cumpromiss tranter etica e Big Data u intelligentscha artifiziala. Interessant è il svilup dal temp ed en tge cundiziuns ch’ils umans èn pronts da metter lur datas a disposiziun. Quai tutga per exempel als avantatgs ch’els survegnan en il barat da datas, sco buns persunals da Migros Cumulus. Ma era la segirezza gioga ina rolla gronda. Nus vesain quai spezialmain cura che l’imprinta dal vusch u da fatscha porta in avantatg per la segirezza persunala, sco tar l’identificaziun per la banca u l’assicuranza. En talas situaziuns è la prontadad pli gronda.»
Sin tge datas fissas ti gugent inaga access?
«Sin bleras, dentant m’interessa principalmain l’analisa da datas. Il mund è fatg da datas, uschia er noss mintgadi. Savens dumond jau mai tge che la retscha da datas u l’algoritmus pertutgant vesess ora. Per exempel en il traffic tar semafors, durant viadis cun indicaziuns da temp u tar cumissiuns en Migros cun la carta Cumulus.»
Tge recumondas ti ad ina interpresa che na sa anc betg fatschenta cun Big Data? Da tge cumenza ins meglier?
«Il meglier è d’entschet cun l’analisa da la situaziun: tge datas èn avant maun? Sin basa da quai definis ins emprims cas d’applicaziun focusads cun in aut potenzial d’utilisaziun.»
Davart Carla
Carla Caspar maina il sectur da Data Science tar l’interpresa da tecnologia Inventx AG. En sia professiun cusseglia ella bancas ed assicuranzas en lur strategias da digitalisaziun en connex cun in business drizzà tras datas ed il diever d’intelligentscha artifiziala, per exempel tar Client Analytics, detectaziun intelligenta da frauds ed AI per dialog (Conversational AI). Era en ses temp liber è la magistra da sport d’enviern fascinada dals temas digitals. Ella ha dedicà sia lavur finala dal diplom federal al tema «Scolas da sport d’enviern e digitalisaziun». Carla Caspar è commembra dal cussegl spezial tar GRdigital.