Communicaziuns 23.02.2023
Glisch verda per in studi da realisabladad pertutgant il provediment medicinal
La Regenza garantescha a la Swissrehamed ScRL ina contribuziun chantunala da maximalmain 9900 francs per examinar la realisabladad dal «Competence Center Exergames». Ella ha deliberà questa contribuziun en il rom da la Lescha davart la promoziun da la transfurmaziun digitala en il Grischun. Il project è budgetà cun 25 500 francs.
La digitalisaziun influenzescha pli e pli fitg la concepziun da nossa vita. Uschia mussa la tendenza actuala da fitness medicinala ina fusiun dal martgà da sport e dal provediment medicinal. Novas tecnologias procuran per purschidas digitalas da trenament e da terapia. En il rom dal project actual duai vegnir examinà, sch’igl è raschunaivel da domiciliar in tal center da cumpetenzas (Competence Center Exergames, CCE) en il chantun Grischun. Sut la direcziun da la partenaria economica Swissrehamed ScRL e cun la participaziun da la Scola auta spezialisada dal Grischun duain expertas spezialisadas ed experts spezialisads examinar e valitar il niz presumà, quai a chaschun da dus lavuratoris.