Medienmitteilung 10.05.2021
Ponderaziuns dal President
Preziadas commembras fundaturas e stimads commembers fundaturs
Dapi blers onns m’engasch jau per la digitalisaziun sco schanza per il territori rural. Il chantun Grischun ha surpiglià ina rolla da precursur e definì sin il stgalim politic las basas legalas e mess a disposiziun la finanziaziun necessaria. Cun fundar en curt l’Uniun GRdigital pudain nus metter il fundament per promover numerus projects da digitalisaziun – ina schanza nunditga per l’entira economia publica grischuna. La digitalisaziun duai servir a l’uman e betg viceversa. Soluziuns digitalas duain vegnir duvradas sco instruments per dar novas pussaivladads a las interpresas ed instituziuns en noss chantun. En il Grischun èn represchentadas numerusas branschas e grazia a las bleras regiuns ed a sias trais linguas uffizialas ha el ina posiziun singulara en cumparegliaziun cun ils auters chantuns da la Svizra. Cunzunt las acturas ed ils acturs che ston cumbatter cun sfidas particularas duain survegnir novas perspectivas cun la transfurmaziun digitala.
L’Uniun GRdigital duai surpigliar trais incumbensas: iniziar, accumpagnar e validar. L’ultim punct è in’incumbensa principala en il mandat da prestaziun dal Chantun. Il grond profit pudain nus però trair dals emprims dus puncts. Mo sche nus definin proactivamain ils focus principals e tschertgain activamain propostas per soluziuns, vegn GRdigital ad avair il dretg effect. Cun accumpagnar las iniziativas garantin nus plinavant ch’ils projects adempleschan il meglier pussaivel ils criteris da promoziun.
Furmar ecosistems è ina premissa essenziala per pudair realisar cun success projects digitals. Dapi prest 10 onns m’engasch jau per iniziativas che cumpiglian pliras firmas, branschas e regiuns en l’entira Svizra. Tut las acturas e tut ils acturs ston esser averts per tals projects. Era sin il sectur tecnologic è l’avertezza in primat relevant. En spezial en il Grischun èsi fitg impurtant da collavurar en tals ecosistems. E quels duain explicitamain tanscher sur ils cunfins geografics da noss chantun. Mo sche nus essan averts da collavurar en partenadis naziunals ed internaziunals, vegnin nus a dumagnar cun success la transfurmaziun digitala.
Per che l’Uniun GRdigital possia agir cun success, stuain nus integrar las purtadras ed ils purtaders da know-how e las forzas innovativas en l’ambient digital dal Grischun. En nagin cas na dastga quai però avair la consequenza che questas exponentas e quests exponents excludan cun lur engaschament sasezs d’eventualas contribuziuns da promoziun. Perquai stuain nus da l’entschatta definir co che nus vulain tractar a moda clera, transparenta e reglada eventuals conflicts d’interess. La radunanza generala duai approvar las directivas da «good governance» correspundentas.
Jau ma sent onurà da la dumonda da surpigliar il presidi da GRdigital. Cun plaschair e respect stun jau a disposiziun per quest uffizi. En la fasa da preparaziun hai jau fatg part d’in team fitg cumpetent, engaschà ed avert. Sis persunas da questa gruppa da preparaziun candideschan medemamain per in post en la suprastanza da GRdigital, perquai sun jau persvas d’avair la meglra basa pussaivla per mes engaschament. Cun la suprastanza designada è era garantida la varietad areguard la vegliadetgna, schlattaina, cultura e derivanza professiunala che ma stat a cor. En il decurs da l’emprim onn da gestiun laschass jau gugent anc eleger en la suprastanza ina represchentanta u in represchentant da las regiuns italofonas.
En quel senn empermet jau – premess che jau vegnia elegì sco president – da far mes pussaivel per che l’entir chantun Grischun vegnia preferì sco lieu d’abitar e da lavurar grazia al diever da la digitalisaziun.
Cordials salids
Jon Erni
President